నేలకొరిగిన 150 ఏళ్ల సినిమా చెట్టు

ఆంధ్రప్రదేశ్‌ లోని రాజమండ్రి సమీపంలో గోదారి గట్టున చారిత్రాత్మకమైన భారీ వృక్షం నేలకొరిగింది. సుమారు 150 ఏళ్లకు పైగా గోదారి గట్టున సగర్వంగా నిలిచిన ఈ మహా వృక్షం కుప్పకూలిపోయింది. ఎన్నో ప్రకృతి విపత్తులను, గోదావరి వరదలను ఎదుర్కొని నిలిచిన ఈ మహా వృక్షం నేలకూలిపోవడం అందరిని కలిచివేస్తోంది.

తూర్పుగోదావరి జిల్లా కొవ్వూరు మండలం కుమారదేవం గ్రామంలో గోదావరి ఒడ్డున 150 ఏళ్లకు పైగా నిటారుగా నిలుచున్నదీ నిద్రగన్నేరు వృక్షం. ఈ చెట్టును స్థానికంగా సినిమా చెట్టు అని పిలుస్తారు. ఎందుకంటే ఇక్కడ చాలా సినిమాలు షూటింగ్ లు జరిగాయి. సుమారు 300 లకు పైగా సినిమాలు ఈ మహా వృక్షం దగ్గర చిత్రీకరణ జరుపుకున్నాయి. ఈ మహా వృక్షం ఎన్నో సన్నివేశాలకు కొత్త అందాల్ని అద్దింది.

ప్రముఖ దర్శకులు బాపు, కె. విశ్వనాథ్, కె. రాఘవేంద్ర రావు తదితరులు తమ సినిమాల్లోని చాలా సన్నివేశాల్ని ఈ నిద్రగన్నేరు చెట్టు దగ్గర చిత్రీకరించారు. అక్కినేని నాగేశ్వరరావు నుంచి మొదలు కొని క్రిష్ణంరాజు, క్రిష్ణ, చిరంజీవి, బాలక్రిష్ణ, మోహన్ బాబు తదితర అగ్రహీరోల సినిమాలను ఇక్కడే షూట్ చేశారు. 1975 లో విడుదలైన పాడి పంటలు సినిమాలో ఈ చెట్టు హైలెట్ గా నిలిచింది. ఆ తర్వాత పలు సినిమా షూటింగ్ లు ఈ భారీ చెట్టు బ్యాక్ గ్రౌండ్ లో జరిగేవి.

అక్కినేని నాగేశ్వర రావు, మీనా కాంబినేషన్ లో వచ్చిన సీతారామయ్యగారి మనవరాలు సినిమాలోని కీలక సన్నివేశాలు ఈ నిద్రగన్నేరు చెట్టు దగ్గరే చిత్రీకరించారు. ఎన్నో వందల సినిమాలకు సాక్ష్యంగా నిలిచిన ఈ మహా వృక్షం ఇప్పుడు నెలకరగడంతో అంతా  ఆవేధన వ్యక్తం చేస్తున్నారు. ప్రతి సంవత్సరం గోదారి వరదలకు గట్టు కొద్దికొద్దిగా దిగబడి, చివరకు చెట్టు మొదలు రెండుగా చీలిపోవటంతో నేలకొరిగింది.